म्यानचेस्टर युनाइटेड एभर्टनसँग लज्जास्पद हार व्यहोरेको छ। इंग्लिस प्रिमियर लिग अन्तर्गत आइतबारको खेलमा शीर्ष चारको होडमा रहेको म्यानचेस्टर युनाइटेड एभरटनको घरेलु मैदानमा ४-० को फराकिलो अन्तरले पराजित भएको हो।

एभरटनलाई जिताउन रिचार्लीसन, गिल्फी सिगर्डसन, लुकास डीग्ने र वालकटले एक एक गोल गरे।

खेलको १३औं मिनेटमा रिचार्लीसनले गोल गर्दै घेलु टोलीलाई सुरूवाती अग्रता दिलाए।

खेलको २८ औं मिनेटमा गिल्फी सिगर्डसनले इड्रीसा गेयेको पासमा गोल गर्दै टोलीको अग्रता दोब्बर पारे।

पहिलो हाफमा २ गोलको अग्रता लिएको घरेलु टोलीले दोस्रो हाफमा थप दुई गोल गर्‍यो।

दोस्रो हाफको ५६ औं मिनेटमा लुकास डीग्नेले गोल गर्दै अग्रता तेब्बर पारे।

खेलको ६४ औं मिने६मा थियो वालकटले गोल गर्दै एभरटनलाई फराकिलो अग्रता दिलाए।

यसपछि दुबै टोलीबिच गोल हुन नसक्दा युनाइटेडले लज्जास्पद हार व्यहोर्‍यो।

यो हारसँगै युनाइटेडले शीर्ष ४ मा प्रवेश गर्ने मौका गुमाएको छ। युनाइटेडले ३४ खेलमा ६४ अंक जोडेको छ। तेस्रो स्थानमा रहेको टोटेनहमले ३४ खेलमा ६७ अंक जोडेको छ। ३३ खेल खेलेको चौथो स्थानको आर्सनल र ३४ खेल खेलेको पाँचौ स्थानको चेल्सीको समान ६६ अंक छ। शीर्ष स्थानमा रहेको लिभरपुलको ८८ अंक रहँदा दोस्रो स्थानमा रहेको म्यान्चेष्टर सिटीको ८६ अंक छ।