युएई आगामी वर्ष दक्षिण अफ्रिकामा हुने यु १९ विश्वकपमा छानिएको छ।  मलेसियामा सम्पन्न एसियाली छनोटमा लगातार पाँचौ जित निकाल्दै युएई विश्वकप यु १९ का लागि छानिएको हो।

समूह चरणको अन्तिम खेलमा ओमानलाई १० विकेटको फराकिलो अन्तरले हराउँदै युएई विश्वकपमा पुगेको हो।

ओमानले दिएको १०६ रनको लक्ष्य युएईले मात्र १२.१ ओभरमा बिना कुनै विकेट क्षति भेट्टायो।

युएईका लागि ओपनरद्वय सइद हैदार कप्तान आर्यन लाक्राले अर्धसतकीय पारी खेले। हैदरले २८ बलमा ५६ रन बनाउने क्रममा ८ चौका र १ छक्का प्रहार गरे भने। कप्तान लाक्राले ५४ बलमा ९ चौकासहित ५१ रन जोडे।

यसअघि प्रतियोगिताको पहिलो खेलमा घरेलु टोली मलेसियालाई ५ विकेटले हराएको युएईले दोस्रो खेलमा नेपाललाई १ रनले हरायो। तेस्रो खेलमा कुवेतमाथि ७ विकेटको जित निकालेको युएईले चौथो खेलमा सिंगापुरलाई ९ विकेटले हराएको थियो।