तिहारको दोस्रो दिन अर्थात् कुकुर तिहार । हिन्दु धर्मावलम्बी नेपालीहरूको दोस्रो ठूलो चाडअन्तर्गत तिहार (यमपञ्चक)को दोस्रो दिन कुकुर तिहार मनाउने गरिन्छ । यस दिन कुकुरको पूजा गरी मीठामीठा खानेकुरा दिने प्रचलन छ ।
रक्षक तथा पहरेदारका रुपमा कुकुरले निर्वाह गर्ने भूमिकाकै कारण कतिपयले कुकुर पाल्ने गर्छन् । आजको दिन कुकुरलाई भोजन गराउँदा यमराज तथा पितृहरू खुसी हुने धार्मिक मान्यता छ ।
कुकुर आज्ञाकारी र विश्वासिलो घरपालुवा जनावर हो । यही विशेषताका कारण कुकुरलाई विशेष तालिम दिएर सुरक्षा निकायले अपराध अनुसन्धानमा प्रयोग गर्दै आएका छन् ।
