संविधानसभाको निर्वाचन हुँदै गर्दा मलाई लागेको थियो- संविधान सभाले बनाएको संविधानलाई सारा मुलुकले अपनत्व गर्छ, एकाकार हुन नसकेको मुलुक एकाकार हुन्छ र हाम्रा राजनीतिक समस्याहरुको सम्बोधन हुन्छ । देश समृद्धिको बाटोमा लाग्छ । यही ठानेर म पनि संविधानसभा गराउनलाई लागेको थिएँ ।
संविधान निर्माणको अघिल्ला अवस्था (पहिलो संविधान सभा) हरुमा हाम्रो धेरै विमति रहेन । तर, संविधान पारित गर्ने प्रक्रिया र पद्दतीहरु जस्तो किसिमको भयो, त्यसले आशंका पैदा गरिदियो । सबैलाई डर लाग्यो । परिणाममा अहिले संविधानमा कसैको समर्थन, कसैको विरोध, कसैको आधा समर्थन ।
