२०७२ साल वैशाख १२ गतेको भूकम्प भन्दा शक्तिशाली थियो १९९० सालको भूकम्प। त्यसबेला काठमाडौं उपत्यकामा रहेका धेरैजसो घर र मन्दिरहरु भत्किएका थिए।
१९९० सालको भूकम्पमा भत्किएका कयौं मन्दिरको पुनर्निमाण गर्ने काम राणाहरुले नै गरे। तर, केही मन्दिरहरुले आफ्नो ऐतिहासिक स्वरुप गुमाए। फलस्वरुप नयाँ पुस्तालाई ती मन्दिरको इतिहासबारे ज्ञान हुने कुरै भएन।
१९९० सालको भूकम्पमा भत्किएको तर आफ्नो मौलिक शैली गुमाएर ओझेलमा परेको मन्दिरमध्ये एक हो, पाटन दरबार क्षेत्रमा रहेको काशी विश्वनाथको प्रतीक मानिने उमामहेश्वरको मूर्ति रहेको ऐतिहासिक भाइदेग:।
१७३५ सालमा पाटनका राजा श्रीनिवास मल्लका पालामा चौतारा (प्रधानमन्त्री) रहेका भारो भगीरथ भैया (भगाजु)ले उमामहेश्वरको मूर्ति स्थापना गरी तीन तल्ले प्यागोडा शैलीको मन्दिर बनाएका थिए।
