एसीसी इमर्जिङ एसिया कप क्रिकेटमा नेपालले अहिले बंगलादेशविरुद्द खेलिरहेको छ।

समूह चरणको अन्तिम खेलमा टस जितेर बंगलादेशले फिल्डिङ गर्ने निर्णय गरेपछि मैदानमा उत्रिएको नेपालले ४४ ओभर ३ बलमा अलआउट हुँदै १ सय ३८ रन बनायो । 

जितका लागि १ सय ३९ रनको लक्ष्य पाएकाे बंगलादेश केहिबेरमा मैदान उत्रिनेछ।

यसअघि नेपालका लागि सोमपाल कामीले ६३ बलमा ४ चौका प्रहार गरेर ६३ बलमा सर्वाधिक ३८ रन बनाए । यस्तै कप्तान ज्ञानेन्द्र मल्ल २२,करण केसी १८, कुशाल भुर्तेल १०, आरिफ शेख ११,र पवन शराफले ९ रन बनाए।

बंगलादेशका मिन्हाजुल अब्दीन अफ्रिदी र सुमोन खानले समान ३/३ विकेट हात पारे ।

यस्तै तन्भिर इस्लामले २ विकेट हात पार्दा मेहेदी हसनले १ विकेट लिए ।

अघिल्लो चरण प्रवेशको लागि नेपाललाई बंगलादेशविरुद्ध जित निकाल्नै पर्ने दबाब छ।

ढाकामा बिहिबार भएको पहिलो खेलमा नेपाल भारतको यू–२३ टिमसँग ७ विकेटले पराजित भएको थियो।

यस्तै शनिबार दोस्रो खेलमा हङकङलाई ४० रनले पराजित गरेको थियो।

बंगलादेशले पहिलो खेलमा हङकङलाई ९ तथा भारतलाई ६ विकेटले पराजित गरेको थियो।

प्रतियोगितामा युएईले नाम फिर्ता लिएपछि नेपालले खेल्ने मौका पाएको थियो।

समूहको शीर्ष दुई टिमले सेमिफाईनल खेल्नेछन्।