बंगलादेशविरुद्धको तीन खेलको टी–ट्वान्टी क्रिकेट सिरिज भारतले जितेको छ ।

नागपुरमा आइतबार भएको तेस्रो तथा अन्तिम खेलमा बंगलादेशलाई ३० रनले पराजित गर्दै भारतले सिरिज २–१ ले जितेको हो ।

भारतले दिएको १ सय ७५ रनको लक्ष्य पछ्याएको बंगलादेशले १९ ओभर २ बलमा अलआउट हुँदै १ सय ४४ रनमा समेटियो ।

बंगलादेशको लागि मोहमद नाइमले ८१ रनको अर्धशतकीय इनिङ्स खेलेपनि टिमलाई जित दिलाउन सकेनन् । यस्तै मोहमद मिथुनले २७ रन बनाए ।

 बंगलादेशलाई सस्तैमा समेट्न भारतका दिपक चाहरले ह्याट्रिकसहित ६ विकेट लिए । यस्तै शिभम डुबेले ३ विकेट लिए ।

 यस अघि टस हारेर पहिले ब्याटिङ गरेको भारतले २० ओभरमा ५ विकेट गुमाएर १ सय ७४ रन बनाएको थियो ।

भारतको लागि श्रेयर आयर र लोकेश राहुलले अर्धशतकीय इनिङ्स खेले । आयरले ६२ तथा राहुलले ५२ रन बनाए ।

यस्तै मनिष पाण्डेले अविजित २२ तथा शिखर धवनले १९ रन बनाए ।

बंगलादेशका इमुनुल इस्लाम र सौम्य सरकारले समान २/२ विकेट लिए ।

 सिरिज अन्तर्गत पहिलो टी-ट्वान्टी बंगलादेशले ७ विकेटले जितेको थियो । दोस्रो खेलमा भने भारतले ८ विकेटको जित निकालेको थियो ।

अब दुई टोलीले दुई खेलको टेष्ट सिरिज खेल्ने छन् ।