तरुण दलका नेपालगन्ज नगर कमिटी अध्यक्ष सन्दिपजंग शाहसहित चार जनालाई थुनामा राख्न सात दिन म्याद थप गरिएको छ ।

पक्राउ परेका दुई जनालाई संलग्नता नरहेको भन्दै रिहा गरिएको इलाका प्रहरी कार्यालय कोहलपुरका डीएसपी हेमबहादुर शाहीले बताए । उनले भने, ‘चार जनालाई अवैध हातहतियार तथा खरखजाना सम्बन्धी मुद्दाका लागि जिल्ला अदालत बाँकेबाट अनुसन्धानका लागि थुनामा राख्न सात दिन म्याद थप गरिएको छ ।’

इलाका प्रहरी कार्यालय कोहलपुरको टोलीले बिहीबार राति साढे ८ बजेतिर नेपालगन्जको गनापुरस्थित नमस्ते भिलेज रिसोर्टमा अध्यक्ष शाहसँगै प्रितम थापा, माधव नेपाली, यामबहादुर बुढामगरसहित ६ जनालाई गाडीमा लुकाएर राखेको अवस्थामा एक थान अमेरिकी अटोमेटिक पेस्तोल, २ राउण्ड गोली र त्यसको म्याग्जिनसहित पक्राउ गरेको थियो।

घटना लगत्तै डीएसपी शाह र सन्दिपजंग शाहबीचको अडियो सार्वजनिक भएपछि यो घटना झन् विवादित बनेको छ । डीएसपी शाहीले अवैध हतियारको घटनालाई ढाकछोप गर्न प्रपञ्च रचिएको तरुण दलले आरोप लगाएको छ । डीएसपी शाहीले आफूमाथि लगाएको आरोपमाथि पनि छानबिन गर्न माग गरेका छन् ।