बहुदलीय व्यवस्था पुनर्स्थापना भएपछि ०४७ साल जेठ १५ गते राष्ट्रिय प्रजातन्त्र पार्टीको जन्म भयो। जन्मेदेखि नै यी दुइटा शरीर लिएर जन्मियो। एउटा, सूर्यबहादुर थापा नेतृत्वको राप्रपा (थापा), अर्को लोकेन्द्रबहादुर चन्द नेतृत्वको राप्रपा (चन्द)। म थापा नेतृत्वको पार्टीमा संलग्न भएँ। ०४८ सालको चुनाव अलग–अलग लडियो। थापा समूहले एक सिट प्राप्त गर्‍यो, चन्द समूहले तीन सिट जित्यो। थापासहित म आफू पनि पराजित भएँ। त्यसपछि ०४८ साल माघमा दुवै राप्रपा एकीकृत भयो। ०५१ सालका चुनावमा हामीले २० सिट जित्यौँ। त्यतिवेला जब मनमोहन अधिकारी नेतृत्वको नेकपा एमालेको अल्पमतको सरकार ढल्यो, त्यसपछि नेपाली कांग्रेसका नेता शेरबहादुर देउवाको नेतृत्वमा सरकार गठन भयो र, बहुदलीय व्यवस्था पुनर्स्थापनापछि हामी पहिलोपटक देउवा नेतृत्वको सरकारमा गयौँ।