३० वर्षपछि आएको शक्तिशाली आँधीका कारण भियतनाम अस्तव्यस्त बनेको छ। ‘यागी’ नाम दिइएको आँधीका कारण ६० जनाको मृत्यु भइसकेको छ २४० भन्दा बढी घाइते भएका छन्। 

शनिबारदेखि आएको आँधीले उत्तरी भियतनाममा सोमबार फोङ चाउ पुल भत्किँदा दश वटा कार र दुई वटा स्कूटर रेड नदीमा खसेको थियो। जसमा १३ जना बेपत्ता भएका छन्। हालसम्म नदीबाट कम्तीमा तीन जना मानिसहरूको उद्धार गरिएको बिबिसीले लेखेको छ।

पुलमात्र होइन अन्य भौतिक क्षती पनि तीब्र गरेको छ। १५ लाख नागरिक बिजुलीविहीन भएका छन्। भियतनामका तटीय सहरहरूबाट झण्डै ५० हजार मानिसहरूलाई सुरक्षित स्थानमा सारिएको छ। 

भियतनाम अधिकारीहरूले मानिसहरूलाई घरभित्रै बस्न सूचित गरिरहेका छन्। हनोईसहितका १२ उत्तरी प्रान्तमा विद्यालयहरू अस्थायी रूपमा बन्द गरिएका छन्।देशको उत्तर पूर्व तट क्षेत्रमा रेष्टुराँ चलाउने नोयङ थी थोमले आफू र कैयौँ अरू मानिसहरूले आँधीका कारण सब थोक गुमाएको बताएको बिबिसीले लेखेको छ।

‘मसँग केही बाँकी छैन। जब म आसपास हेर्छु मानिसहरूले मजस्तै सर्वस्व गुमाएका छन्,’ उनले भनेकी छिन्। भियतनाममा आउनुअघि यस ‘यागी’ आँधीका कारण दक्षिण चीन र फिलिपिन्समा २४ जनाले ज्यान गुमाएका थिए।