प्रदेश २ को दुई जिल्लाबाट २ जना नक्कली प्रहरी पक्राउ परेका छन् । महोत्तरीबाट एक जना नक्कली प्रहरी पक्राउ परेको दुई दिन नबित्दै धनुषाबाट पनि अर्को एक जना समातिएका छन् । दुबैले आफूलाई नेपाल प्रहरीको घुमुवा भन्दै आएका थिए ।
महोत्तरीको मटिहानी नगरपालिकाबाट महोत्तरीकै लोहारपट्टी नगरपालिका ९ खुट्टा पिपरारी निवासी जयप्रकाश मण्डललाई पक्राउ गरिएको छ । २८ बर्षीय मण्डलले आफू नेपाल प्रहरीको घुमुवा रहेको भन्दै सिमावर्ती क्षेत्रमा व्यापारीहरुसँग रकम असुली गरिरहेका थिए । उनलाई बुधबार पक्राउ गरिएको छ ।
धनुषाको मिथिला विहारी नगरपालिका १० ठेरा बस्ने २७ बर्षीय विश्वनाथ साह पनि नक्कली प्रहरी बनेर रकम असुलीमा लागेपछि पक्राउ परेका छन् । सशस्त्र प्रहरीको टोलीले उनलाई धनुषाको विदेह नगरपालिकाबाट नियन्त्रणमा लिएको छ ।
भारतबाट नेपालतर्फ आउने सर्वसाधारणहरुलाई सादा पोशाकको प्रहरी भनेर चेकजाँच गर्ने र रकम माग्ने गरिरहेको पाइएपछि शुक्रबार उनलाई पक्राउ गरिएको छ ।
उनलाई थप अनुसन्धानका लागि जिल्ला प्रहरी कार्यालय धनुषाको जिम्मा लगाइएको सशस्त्र प्रहरीले जनाएको छ ।
