काठमाडौं । आम रुपमा हाम्रो देश अहिले दसैं मनाउन व्यस्त छ । तर, केही यस्ता पात्रहरु पनि छन्, जसलाई दसैं दुख्ने गरेको छ । जसले पीडामाथि झन् पीडा थप्ने गरेको छ ।
यसरी दसैंले दुखाउने केही प्रतिनिधि पात्रलाई हामीले यसपालि कुरा गरेका छौं । जो विगतको १० वर्षे द्वन्द्वसँग जोडिएका छन् । सो द्वन्द्वका क्रममा करिब १७ हजार मानिस मारिएका थिए भने करिब अढाइ हजार मानिस बेपत्ता भएका थिए । तिनका परिवारका पीडा यी प्रतिनिधि पात्रले भनेकैसँग मिल्दो जुल्दो छ । उनीहरु भन्छन्, ‘‘दसैं आएपछि ती आफन्तको सम्झना आउँछ । त्यसैले दसैं नै नआए हुन्थ्यो जस्तो लाग्छ । ’’
