अन्तर्राष्ट्रिय क्रिकेट काउन्सिल (आईसीसी)ले नेपाल क्रिकेट संघको नयाँ नेतृत्वको स्वागत गरेको छ ।

आईसीसीले मंगलबार विज्ञप्ति जारी गर्दै संघको हालै सम्पन्न चुनावको स्वागत गरेको हो ।संघको हालै सम्पन्न विशेष अधिवेशनले चतुरबहादुर चन्दको नेतृत्वमा १७ सदस्यीय कार्यसमिति चयन गरेको थियो ।

आईसीसीका उपाध्यक्ष इमरान ख्वाजाले भनेका छन्, ‘ हामी खुसी छौं, जुन पछिल्लो तीन वर्षदेखि जारी आईसीसीको सुधार प्रयासको परिणाम हो र यसले नेपाली क्रिकेटमा एकता ल्याएको छ ।’

आईसीसी उपाध्यक्ष ख्वाजाले नयाँ कार्यसमितिले प्रगति गर्ने आशा व्यक्त गरेका छन् । उनले भनेका छन्, ‘आईसीसीको निलम्बन फुकुवाका लागि प्रमुख शर्त पूरा भएको छ । अब दुबईमा बस्ने आईसीसी बोर्ड बैठकले आगामी कदमबारे निर्णय गर्नेछ ।’