सिंगापुर र ओमान भ्रमणका लागि नेपाली राष्ट्रिय क्रिकेट टिम घोषणा गरिएको छ। नेपालका प्रमुख प्रशिक्षक उमेश पटवालले पारस खड्काको कप्तानीमा बिहीबार १५ सदस्यीय राष्ट्रिय टिम घोषणा गरेका हुन्।

टिममा नियमित उपकप्तान ज्ञानेन्द्र मल्ल हुछैनन्। उनले व्यक्तिगत कारणले सिंगापुर र ओमान भ्रमणबाट नाम फिर्ता लिएका थिए। यस्तै अनुभवी बलर बसन्त रेग्मी र ब्याट्सम्यान शरद भेषावकर पनि टिममा छैनन्।

नेपाली टिमले पहिले सिंगापुर र त्यसपछि ओमान भ्रणम गर्दैछ। नेपाली टिम २५ सेप्टेम्बरमा सिंगापुर प्रस्थान गर्नेछ।असोज दोस्रो साता सिंगापुरमा हुने त्रिकोणीय अन्तर्राष्ट्रिय टी–२० सिरिजमा नेपाल, जिम्बावे र आयोजक सिंगापुरबीच प्रतिस्पर्धा हुनेछ।

प्रतियोगिता सिंगापुरले टी–२० विश्वकप छनोटको तयारीका लागि आयोजना गर्न लागेको हो।नेपाल र जिम्बावे छनोटबाट बञ्चित भए पनि सिंगापुर भने विश्वकप छनोट खेल्दैछ।

नेपाल सिंगापुरमा प्रतिस्पर्धा गरेपछि उतैबाट ओमान जानेछ।ओमान हुने प्रतियोगितामा आयोजक ओमान, नेपाल, आयरल्यान्ड, हङकङ र नेदरल्यान्ड्सले प्रतिस्पर्धा गर्दैछन्।