काठमाडौं - नेपाली कांग्रेसभित्र १४औं महाधिवेशन गर्ने कि पार्टीका अपूर्ण संरचनालाई पूर्णता दिने भन्नेमा संस्थापन पक्ष र असन्तुष्ट पक्षबीच मतभेद तीव्र बन्दै गएको छ। सभापति शेरबहादुर देउवा पक्ष दोस्रो चरणको राष्ट्रिय जागरण अभियानअघि नै विधानको व्यवस्था अनुसार विभागसहितका संरचना गठन गर्ने तयारीमा छ। तर, नेता रामचन्द्र पौडेलसहित असन्तुष्ट पक्ष त्यसको विपक्षमा छ।

असन्तुष्ट पक्षले महाधिवेशन भएको तीन वर्षपछि विभागहरु गठन गर्नुको औचित्य नभएको दाबी गर्दै अब नयाँ विधान अनुसार १४औं महाधिवेशनको तयारीमा जुट्नुपर्ने तर्क अघि सारेको छ। स्थानीय, प्रदेश र संघको आगामी निर्वाचन तयारीमा जुट्न पनि समयमै १४औं महाधिवेशन गर्नुपर्ने निष्कर्ष असन्तुष्ट पक्षको छ। पार्टी विधानअनुसार चारवर्षे कार्यकालका लागि देउवा सभापतिमा निर्वाचित भएको तीन वर्ष बढी भइसकेको छ।