विभागीय टोली नेपाल आर्मीले राजधानीमा शुक्रबारदेखि सुरू भएको तेस्रो संस्करणको प्रधानमन्त्री राष्ट्रिय एक दिवसीय क्रिकेट प्रतियोगितामा विजयी सुरूवात गरेको छ।
प्रदेश दुईलाई १ सय ७१ रनको फराकिलो अन्तरले हराउँदै त्रिभुवन आर्मी क्लवले प्रतियोगितामा विजयी सुरूवात गरेको हो।
आर्मीले दिएको २ सय ७९ रनको लक्ष्य प्रछ्याएको प्रदेश २ले ३१.४ ओभरमा अल आउट हुँदै १ सय ७ रनमा समेटियो। उसका लागि ओपनर हरि शंकर शाहले सर्वाधिक २१ रन बनाए। अर्का ओपनर सुधिर चौधरीले १५ रन जोड्दा मध्यक्रम र तल्लोक्रमका ब्याट्सम्यान लगातार कम रनमा आउट भएपछि प्रदेश २ ले फराकिलो हार ब्योहोर्नुपर्यो।
प्रदेश दुईका लागि साम्सद शेख १६, राशिद खानले १४, सुरज पेटलले ११ रन, कृष्णजंग कार्की ९, विशाल शुसलिङ ४, मेहबुब आलम ५, हासिम अन्सारी शून्य र विवेक यादव ५ रनमा आउट भए।
प्रदेश २ लाई सस्तैमा रोक्न आर्मीका साहव आलमले ४ विकेट लिँदा सुशन भारिले ३ विकेट हात पारे। यस्तै जितेन्द्र मुखियाले २ र कुशल मल्लले १ विकेट हात पारेका थिए।
यसअघि टीयू क्रिकेट मैदानमा टस हारेर पहिला ब्याटिङ गरेको आर्मीले निर्धारित ५० ओभरमा ९ विकेट गुमाउँदै २ सय ७८ रन बनाएको थियो।
आर्मीका राजु रिजालले सर्वाधिक ९० रनको उत्कृष्ट पारी खेले। सतक नबाउन १० रनले चुकेका रिजालले १ सय ९ बलमा ५ चौका र २ छक्का प्रहार गरे।
त्यस्तै अर्का ओपनर विनोद भण्डारीले ६६ रन बनाउँदै अर्धसतक पुरा गरे। कप्तानसमेत रहेका भण्डारीले राजुसँग १ सय २१ रनको शतकीय साझेदारी गर्दै टोलीको स्कोर सम्मानजनक पुर्याए।
रोहित कुमार पौडेलले ४७ रनमा बनाउँदा हरि बहादुर चौहाले २६ रन जोडे। यस्तै भिम सार्की ६,राजेश पुलामी मगर ८,करण केसी ११ र कुशल मल्ल ३ रनमा आउट भएका थिए।
प्रदेश २ का लागि हरि शंकर शाहले सर्वाधिक ३ विकेट लिए। त्यस्तै साम्सद शेख,राशिद खान,विवेक यादव र विशाल शुसलिङले समान १-१ विकेट हात पारेका थिए।
यस्तै मुलपानी मैदानमा आज हुने भनिएको प्रदेश १ र नेपाल पुलिसबीचको खेल भएन। मैदान पूर्ण रुपमा तयार नहुँदा जेठ १२ गतेबाट पछि मात्र मुलपानीमा खेल हुने आयोजकले जनाएको छ ।
प्रतियोगिताको उद्घाटन युवा तथा खेलकूदमन्त्री जगतबहादुर सुनार (विश्वकर्मा) र राष्ट्रिय खेलकूद परिषद् राखेपका सदस्यसचिव केशवकुमार विष्टले एक कार्यक्रमबीच गरेका थिए।
प्रतियोगितामा ७ प्रदेश र तीन विभागिय गरि १० टोलीको सहभागिता छ। समूह ए मा एपीएफ, प्रदेश ५, प्रदेश ३, सुदूरपश्चिम र गण्डकी छन्। समूह बी मा त्रिभुवन आर्मी, नेपाल पुलिस, प्रदेश २, प्रदेश १ र कर्णाली प्रदेश छन्। राउन्ड रोविन लिग पछि समूहका शीर्ष २ टोली सेमिफाइनल पुग्नेछन्।
विजेताले उपाधिसहित २० लाख रुपैयाँ प्राप्त गर्नेछ। दोस्रो हुने टोलीले १० लाख रुपैयाँ पाउनेछ। प्रतियोगिताकै उत्कृष्ट खेलाडीले मोटरसाइकल पाउनेछन्। त्यस्तै उत्कृष्ट ब्याट्सम्यान र बलरले समान ५० हजार प्राप्त गर्नेछन्।
एक हातले क्याच लिउने दर्शकले रु ५० हजार पाउने छन्। प्रतियोगिताको फाइनल जेठ २५ गते हुने आयोजकले जनाएको छ।
