काठमाडौँ । बजारको मूल्य भन्ने हो भने एउटा अन्डाको मूल्य १२ रुपैयाँ पर्छ । तेल लिटरको १ सय ५० भन्दा कम मूल्यमा पाइँदैन ।
तर चिकित्सा विज्ञान राष्ट्रिय प्रतिष्ठान वीर अस्पतालको खरिद इकाई शाखाले भने एक पैसामा अण्डा, एक रुपैयाँ तेल खरिद गर्ने सम्झौता गरेको एक महिना भइसकेको छ । दैनिक महँगी बढिरहेको बेला यो मूल्य सुन्दा अचम्म लाग्न सक्छ । पत्याउन गाह्रो हुन्छ । तर वीर अस्पतालले खाद्यान्नको टेन्डर आह्वान गर्दा निकै सस्तो मूल्यमा खाद्यान्नको टेन्डर स्वीकृत गरेको छ ।
अस्पतालले वैशाख १ गते रासन सामग्री खरिदका लागि ‘न्यु सुयोग इन्टरप्राइजेज’को टेन्डर स्वीकृत गरिसकेको छ । टेन्डरका लागि निवेदन दिने तीन इन्टरप्राइजेजमध्ये ‘न्यु सुयोग इन्टरप्राइजेज’ले उपलब्ध गराएको रासन मूल्य लिस्ट धेरै सस्तो थियो । यस्तै चना, लसुन, बेसार, अदुवा, जिरा प्रतिकेजी १ रुपैयाँ, नेबिको, सुगर फ्री बिस्कुट प्याकेटको १ रुपैयाँ, तेल १ रुपैयाँ लिटर, जिरा मसिनो चामल प्रतिकेजी ८० रुपैयाँ, दालप्रति केजी ७५ रुपैयाँ गहुँको आँटा ५ केजीको १ रुपैयाँका दरको मूल्यमा अस्पताललाई दिने गरी टेन्डरको मूल्यसूचीमा उल्लेख गरिएको छ ।
टेन्डर भर्ने ३ इन्टरप्राइजेजमध्ये ‘न्यु सुयोग इन्टरप्राइजेज’ले सबैभन्दा कम मूल्यमा खाद्यान्न उपलब्ध गराउने भए पछि अस्पतालले टेन्डर स्वीकृत गरेको थियो ।
