शीर्षकमा प्रयुक्त ‘हत्यारा’ शब्द पढेर छक्क नपर्नुहोस्, मलाई विश्वास छ, यो पढ्दै गएपछि तपाईं पनि स्वीकार्नु हुनेछः साँच्चै हो रहेछ, प्लाष्टिक त हत्यारा उत्पादन नै पो रहेछ ।
प्लाष्टिकजन्य उत्पादनहरु हाम्रो दैनिक जीवनको अत्यावश्यक र अभिन्न अंगजस्तै बनिसकेको छ, यो कुरामा शायदै कसैले विमति जनाउन सक्ला । हाम्रा चारैतिर हेर्ने हो भने हाम्रो जीवन प्लाष्टिकै प्लाष्टिकले घेरिएको छ । खानेभाँडो, राख्ने भाँडो, चलाउने कम्प्युटर, हेर्ने टिभी, लेख्ने कलम, बोक्ने झोला, गुड्ने गाडी, उड्ने प्लेन, बिजुलीको तार– जता हेर्यो, यत्रतत्र सर्वत्र प्लाष्टिक कुनै न कुनै रुपमा भेटिन्छ । आदि आदि । सूची नै बनाउने हो भने त्यो लम्बेतान बन्दै जान्छ । त्यसैले जम्मामा यति मात्र भनौं, हाम्रो हामी यस हत्यारा उत्पादनमाथि यतिविघ्न आश्रित भइसकेका छौं कि प्लाष्टिकबिना हाम्रो जीवन सामान्य ढंगले सञ्चालन नै हुन सक्दैन ।
