आफ्नो कार्यकालको सबैभन्दा ठूलो र महत्वपूर्ण उपलब्धीका रुपमा अमेरिकी राष्ट्रपति डोनाल्ड ट्रम्पले ‘ब्यापार युद्ध’को सुरुवात गरेका छन्।
दोस्रापटक कार्यकाल सम्हालेसँगसँगै कैयौ कार्यकारी आदेश जारी गर्दै उनी चर्चामा आएका थिए।
आप्रवासीलाई आफ्नै देश फिर्ता गर्ने कठोर निर्णयसँगसँगै उनले संसारभरि नै प्रभाव पर्नेगरी अनुदान र सहयोग पनि कटौती गर्दै आएका छन्।
उनको यो कार्यकालको सबैभन्दा रहस्यमयी विषय भने उनले घोषणा गरिरहेको कर हो। यसबारे अहिलेसम्म स्वतन्त्र विश्लेषकहरूले पनि आफ्नो धारणा बनाउन सकेका छैनन्।
तर ट्रम्पले भने यसलाई ‘अमेरिकाको आर्थिक स्वतन्त्रता दिवस’का रुपमा घोषणा गरेका छन्।
ट्रम्प ढुक्क छन् अमेरिकाले बढाइरहेको यो करले अमेरिकाको अर्थतन्त्र अझ सवल र मजवुत हुनेछ।
ट्रम्प आफैले भनेका छन् ‘यसले विश्व अर्थव्यवस्थामा कस्तो असर पर्छ भन्नेतिर अहिले हामी गइरहेका छैनौं। बरु यसले अमेरिकी अर्थबजार अझ बलियो हुनेछ भन्ने हाम्रो दृढ विश्वास छ।’
अप्रिल ५ देखि न्यूनतम दरमा तोकिएको अर्थात् १० प्रतिशत कर लागु हुनेछ। अमेरिका आयात हुने अर्थात् अमेरिकाले विश्वका जुनसुकै देशबाट ल्याउने सामानमा पनि अब सम्बन्धित देशले न्यूनतम १० प्रतिशत कर तिर्नुपर्नेछ। त्यो भनेको नेपालजस्ता देशका लागि पनि हो।
ठूला र धेरै ब्यापार गर्ने देशहरूका लागि भने उनले निकै उच्चदरको कर कायम गरिदिएका छन्। जस्तो कि अब कतिपय सामग्रीहरूमा चीनले लगभग ६७ प्रतिशतसम्म कर तिर्नुपर्नेछ। नेपालको अर्को छिमेकी भारतले भने लगभग २६ प्रतिशतसम्म कर तिर्नुपर्नेछ। भियतनाजस्ता देशहरूका लागि त ९० प्रतिशतभन्दा धेरै कर तोकिएकाे छ।
अमेरिकाका लागि चीन सबैभन्दा ठूलो निर्यातकर्ता हो। अमेरिकामा दैनिक उपभोग्यलगायत धेरै आवश्यकता र विलासी सामग्रीहरू बाहिरी देशबाटै आयात हुन्छ।
विश्वको सबैभन्दा ठूलो अर्थतन्त्र भएको अमेरिकाले आफ्नो आवश्यकताको लगभग ७० प्रतिशत आयात गर्छ।
अबको यो नयाँ करनीतिले अमेरिका आफैले सक्षम र सवल हुने ट्रम्पले बताएका छन्।
‘यसबाट अमेरिकीले नै रोजगारी पाउनेछन्। विश्वका अरु देशको अर्थव्यवस्था खलबलिनसक्छ तर अमेरिकी अर्थतन्त्र भने बलियो हुनेछ’ ट्रम्पले भनेका छन्।
अमेरिकाले लगाएको नयाँ करको प्रभाव नेपाललाई पनि पर्नेछ। तर अरुको तुलनामा नेपालले थोरैमात्र कर तिर्नुपर्ने भएका कारण यो नेपालका लागि अवसर पनि हुनसक्ने विश्लेषकहरू बताउँछन्।
नेपालले लगभग ३२० प्रकारका वस्तुहरू अमेरिका पठाउँछ। भन्सार विभागको तथ्याङ्कअनुसार यो आर्थिक वर्षका ८ महिनामा नेपालले लगभग ११ अर्ब ३८ करोड बराबरको सामान अमेरिका निर्यात गरेको छ। र, अमेरिकाबाट १७ अर्बभन्दा बढी का वस्तु नेपालमा आयात भएका छन्।
नेपालबाट अमेरिका निर्यात हुने सबैभन्दा धेरै भनेको गलैँचा, छुर्पी, छालाजन्य वस्तुका उत्पादन तथा कपडाहरूलगायत छन्।
छिमेकी देशपछि नेपालले सबैभन्दा धेरै सामान पठाउने देश अमेरिका हो भने विश्वका विभिन्न मुलुकमध्ये अमेरिका छैठौं आयातित देश हो।
