प्रमुख सेनानी रामचन्द्र श्रेष्ठको नेतृत्वमा नेपाली सेनाको टोली मेडिकल राहत बोकेर म्यानमार प्रस्थान गरेको छ।
हालै गएको विनाशकारी भूकम्पका कारण भएको व्यापक धनजनको क्षति पश्चात् नेपाल सरकारको निर्णयबमोजिम मेडिकल राहतसहित नेपाली सेनाको टोली बुधबार म्यानमार प्रस्थान गरेको सेनाले जनाएको छ।
प्रमुख सेनानी श्रेष्ठको नेतृत्वमा १२ जना चिकित्सकीय टिम, ४ जना बन्दोबस्ती सहायता टिम र ६ जना क्रु मेम्बरसहित २२ सदस्यीय टोली नेपाली सेनाको सीएन-२३५ सीएएसए विमानद्वारा म्यानमारतर्फ प्रस्थान गरेको छ।
यो पनि-
विभिन्न प्रकृतिका आवश्यक औषधि एवं ईक्युप्मेन्टहरू सहित उक्त टोलीमा सर्जन, अर्थोपेडिक, मेडिसिन चिकित्सक, नर्स तथा प्यारामेडिकहरू समावेस छन्।
नेपाली सेनाको टोलीले करिब एक साता म्यानमार भूकम्पमा परी घाइते भएकाहरूको स्वास्थ्य उपचारमा खटिई सेवा प्रदान गर्नेछ।
