पोखरा महानगरपालिकाले कोटिहोमका लागि भन्दै अबैध तरिकाले महानगर क्षेत्रमा काटिएको बरपिपलका दाउरा जफत गरेको छ। लेकसाइडस्थित रत्नमन्दिर परिसरमा थुपारिएको दाउरा बुधबार महानगरले जफत गरेको हो।
मेयर धनराज आचार्यका अनुसार ५० ट्रकभन्दा बढी दाउरा महानगरले जफत गरेको छ। मानव सेवा फाउन्डेसनले पोखराका विभिन्न ठाउँबाट चौतारा र रुख ढालेर र दाउरा जम्मा पारेको हो।
यता मानव सेवा फाउन्डेसनले आगामी चैत १७ गते देखि ४५ दिन लामो कोटिहोम लगाउने भन्दै पोखरा महानगर क्षेत्रभित्रका ऐतिहासिक तथा धार्मिक दृष्टिले महत्वपूर्ण ठानिएका बरपिपलका अबैध तरीकाले काटेपछि पोखरामा तरंग उत्पन्न भएको छ।
पोखराका स्थानीय बासिन्दा, सामाजिक अभियन्ता एवं वातावरणविद, र धार्मिक व्यक्तित्वहरू सबै पोखरा महानगरपालिकाको क्षेत्र भित्र पर्ने ऐतिहासिक तथा धार्मिक दृष्टिले महत्वपूर्ण बरपिपल काट्ने जो कोहि भएपनि कडाभन्दा कडा कानूनी कारबाही हुनुपर्नेमा एक मत देखिएका छन्।
तर धार्मिक संघ-संस्थामा आबद्ध व्यक्तिहरूले कोटिहोम लगाउदा पोखरामा धार्मिक पर्यटक बढ्ने र यहाँको पर्यटनका बारेमा ब्यापक प्रचार-प्रसार हुने भएकाले प्रक्रिया पुर्याएर भए पनि मानव सेवा फाउन्डेशन वा अन्य जो कोही संघ-संस्थालाई पोखरामा कोटीहोम गर्न दिनुपर्नेमा उभिएका छन्।
पोखरा महानगरपालिकाका मेयर धनराज आचार्यले पोखरामा कोटीहोम गर्न कोही कसैले महानगरबाट स्वीकृति नलिएको जानकारी दिंदै स्वीकृत नलिएको अवस्थामा कोटीहोम गर्ने नदिने स्पष्ट पारेका छन्। उनले अनधिकृत रुपमा बरपिपलका रुख काट्नेलाई कानूनको दायरामा ल्याइने बताए।
पोखरा महानगरपालिकाको महानगरीय प्रहरी बलका प्रमुख प्रहरी निरीक्षक पुरुषोत्तम थापाले मानव सेवा फाउन्डेशनले महानगरसँग स्वीकृति नलिई पोखरा १४, १३ र ६ मा बरपिपलका रुख काटेर थुपारेकाले जफत गरिएको जानकारी दिए।
