रूपन्देहीको बुटवलस्थित सुप्रिम बचत तथा ऋण सहकारी संस्थाको रकम अपचलन सम्बन्धी मुद्दामा राष्ट्रिय स्वतन्त्र पार्टी (रास्वपा)का सभापति रवि लामिछानेविरुद्ध थुनछेक बहस जारी छ।

बुधबार रूपन्देही जिल्ला अदालतका न्यायाधीश प्रल्हादकुमार योगीको इजलास लामिछानेको बयान सकिएको थियो। आज थुनछेक बहस जारी छ। बहसपछि लामिछानेलाई साधारण तारेख, धरौटी जमानतमा रिहाइ गर्ने वा पुर्पक्षका लागि थुनामा पठाउने भन्ने टुंगो लाग्ने छ।

रास्वपा रुपन्देही स्रोतका अनुसार बहस लामो हुने भएकोले लामिछानेको तर्फबाट बहसका लागि समेसम्म कम वकिलहरूलाई बहसमा उतारिँदै छ।

हिजो इजलासले बिहीबार बिहान १० बजे अदालतमा उपस्थित हुने सर्तमा हाजिरी जमानीमा पत्नी निकिता पौडेल र कानून व्यवसायीको जिम्मामा छाडेको थियो। लामिछाने आज थुनछेक बहसका लागि अदालतमा उपस्थित भएका थिए।

सुप्रिम सहकारीमा रहेका १ हजार ८३१ बचतकर्ताको ८६ करोड १८ लाख २३ हजार ७५४ रुपैयाँ हिनामिना गरेको दाबी गर्दै २८ जनाविरुद्ध मुद्दा दायर भएको थियो।गत बैशाख ३ मा पहिलो पटक मुद्दा दायर भए पनि लामिछानेलाई भने पूरक उजुरीमा राखिएको हो।

प्रहरीले सुप्रिम सहकारीबाट १४ करोड २९ लाख रुपैयाँभन्दा बढी रकम गोर्खा मिडिया नेटवर्क प्रालिमा गएको र २ करोड रुपैयाँ भने रवि लामिछानेको नाममा ऋण गएको भेटिएपछि उनी माथि उजुरी गरेको हो।