यदाकदा समय र सन्दर्भले ‘पात्र’ को महत्वलाई आकस्मिक रूपमा गम्भीर बनाउँछ। जति उसको ‘स्वत्व’ थियो वा हो, त्योभन्दा धेरै। ‘नयाँ’ र ‘उदीयमान’ भनिएको राष्ट्रिय स्वतन्त्र पार्टी (रास्वपा) का महामन्त्री डा. मुकुल ढकाल अहिले त्यस्तै व्यक्ति सावित भएका छन्।
उनले पार्टीको आन्तरिक प्रयोजनका लागि तयार गरेको एक ‘समीक्षा प्रतिवेदन’ ले सञ्चारमाध्यममा राम्रो स्पेश पाएको छ। तर, यो अकारण भने छैन। रास्वपाको इतिहास, राजनीतिक अडान र योगदान, जेजस्तो होस् वा नहोस्– कम्तीमा यो प्रतिनिधिसभाभित्रको चौथो ठूलो र महत्वपूर्ण सत्ता साझेदार दल हो। यो यथार्थले उनको प्रतिवेदनलाई प्रासंगिक बनाउँछ।
