अमेरिकाको विद्यार्थी भिसा पाउने नेपाली विद्यार्थीको संख्यामा एकसय ३८ प्रतिशतले वृद्धि भएको छ। अमेरिकी विदेश मन्त्रालय, ब्यूरो अफ कन्सुलर अफेयर्सले जारी आर्थिक वर्ष २०२४ को पहिलो तीन महिना अक्टोबर, नोभेम्बर र डिसेम्बरको प्रतिवेदनमा यस्तो तथ्याङ्क देखिएको हो।
यी तीन महिनामा दुईहजार आठसय ९६ नेपाली विद्यार्थी र तिनका एकसय ११ आश्रितले अमेरिकाको भिसा पाएका छन्। प्रतिवेदनमा अक्टोबरमा पाँचसय आठ, नोभेम्बरमा सातसय ८४ र डिसेम्बरमा एकहजार छसय चार नेपाली विद्यर्थीलेले अमेरिकाको विद्यार्थी भिसा पाए।
तर, अघिल्लो आर्थिक वर्ष २०२३ को पहिलो तीन महिनामा भने एकहजार दुईसय १२ नेपाली विद्यार्थी र तिनका ८२ आश्रितले मात्र अमेरिकाको भिसा पाएका थिए। ब्यूरो अफ कन्सुलर अफेयर्सका अनुसार २०२२ को अक्टोबरमा एकसय २०, नोभेम्बरमा चारसय ७७ र डिसेम्बरमा छसय १५ नेपालीले अमेरिकाको विद्यार्थी भिसा पाएका थिए।
अमेरिकाको विद्यार्थी भिसा पाउँने धेरै नेपाली विद्यार्थीमा युएसएमएलई परीक्षा पास गरेर चिकित्सा शिक्षा अध्ययन गर्न आउने विद्यार्थी र उनीहरूका आश्रित थिए। २०२३ मा मात्र एकहजार आठसय ८८ नेपाली चिकित्सकले अमेरिकाका लागि अनुमति पत्र जीएससी (गुड स्ट्यान्डिङ सर्टिफिकेट) लिएका थिए । तीमध्ये धेरैजसो अमेरिका आएका थिए। उनीहरूमध्ये आठसय ३२ नेपाली चिकित्सकको त केही समयअघि युएसएमएलई स्कोर नै रद्द भएको थियो ।
अमेरिकी सरकारको अन्तर्राष्ट्रिय विद्यार्थीहरूको आधिकारिक तथ्याङ्क राख्ने ओपन डोर्स प्रतिवेदनका अनुसार अमेरिकामा २०२३ मा १५ हजार ९० नेपाली विद्यार्थी अध्ययनरत् छन् । यो संख्या अमेरिकामा अहिलेसम्म अध्ययनरत् नेपाली विद्यार्थीको सबैभन्दा ठूलो संख्या हो । यो संख्यासँगै नेपाल अमेरिकामा विदेशी विद्यार्थीको संख्याको आधारमा ११औं स्थानमा पुगेको छ।
