जसको साथमा जनता हुन्छन्, जसमा काम गर्ने लगनशीलता हुन्छ, उसलाई जति जालझेल वा घेराबन्दी गरी तल झार्न खोजे पनि ऊ एक दिन अवश्य माथि पुग्न सक्छ भन्ने उदाहरण रवि लामिछानेले दिएका छन् । गत मंसिर ४ को आम निर्वाचनदेखि यही वैशाख १० को उपनिर्वाचन बीचका राजनीतिक घटनाक्रमलाई नियाल्दा मूलतः रविकै सबैभन्दा धेरै चर्चा भएको देखियो, उनीमाथि चौतर्फी प्रहार र घेराबन्दी समेत भए ।
भनिन्छ, बिहानीले दिनको संकेत गर्छ । रवि र उनी नेतृत्वको राष्ट्रिय स्वतन्त्र पार्टी (रास्वपा) अहिले उदाउँदो सूर्यझैँ देखिएका छन् । भोलिका दिनमा रविको राजनीतिक यात्रा कस्तो हुने हो भनी आजै ग्यारेन्टीका साथ भन्न सकिँदैन, एक किसिमको आकलन गर्न भने अवश्य सकिन्छ । हिजो सञ्चारकर्मी हुँदा उनले खासगरी भुइँमान्छेका समस्यालाई केन्द्रमा राखेर काम गरे । विदेशमा हराएका र अलपत्र परेका नेपाली दाजुभाइ तथा दिदीबहिनीको उनले उद्धार गरे, चेलीबेटी बेच्ने कति दलाललाई पुलिसको खोरमा पु¥याए, आफ्नै विद्यार्थीलाई बलात्कार गर्न खोज्ने शिक्षकलाई जेलको चिसो कुनामा कोचे, भ्रष्टाचारीलाई रंगेहात पक्राऊ गर्न पुलिसलाई मद्दत गरे ।
