अमेरिका घुमघामको दौरानमा हामी सन् २०२२ सेप्टेम्बर सातमा स्थानीय समय अनुसार दिउँसो दुईबजे क्यालीफोर्नियाको लसएन्जलसबाट नेभाडाको लसभेगासका लागि उड्यौं।
विमानस्थलबाट हवाईजहाज उडिसकेपछि लसएन्जलस सहरलाई तीनतिरबाट घेरेर राखेको प्रशान्त महासागर हामीतिर हेरेर मुस्कुराई रहेको थियो। जहाजले प्रशान्त महासागरमाथि एक फन्को लगाउँदै गर्दा मेरो मनमा एउटा रमाईलो अनुभूतिले प्रक्षेपित गरिरहेको थियो। हेर्दाहेर्दै भूँई कुहिरोले प्रशान्त महासागरलाई थोरै छोपिदियो। जादुगरले चटक गरेझैं ठाउँ वस्ती लुकाईदिने हुस्सुको चटक आफ्नै गतीमा उडिरहेका हवाइजहाजसँग मज्जा लिईरहेकी थिएँ।
