दुई महिना अगाडि बेलायतको प्रख्यात सञ्चारमाध्यम ‘द सन’ ले एउटा समाचार छाप्यो, ‘एक २० वर्षीय फुटबलर बलात्कारको आरोपमा पक्राउ ।’ द सनसँग ती फुटबलरको नाम र फोटो नभएर होइन, आरोप, आरोपपछि अदालतमा पुग्ने अभियोग र अभियोग पुष्टि नभएसम्म उनी निर्दोष हुन् भन्ने कानुनी मान्यताका आधारमा ती आरोपित फुटबलरको नाम गोप्य राखिएको थियो ।
बेलायतमा मात्रै होइन, अन्य केही देशमा पनि बलात्कारजस्ता अपराधमा आरोपित व्यक्तिहरुको नाम गोप्य नै राखिन्छ । जब अदालतबाट दोषी ठहर हुन्छन्, तबमात्रै ती व्यक्तिको नाम सार्वजनिक गरिन्छ । किनभने अहिले नै सबै गोपनीयता बाहिर ल्याइदिँदा भोलि अदालतबाट सफाई पाए पनि समाजमा बस्नै गाह्रो हुने भएकाले सामाजिक जीवनमा क्षति नहोस् भनेर पनि उनीहरुको नाम गोप्य राख्ने गरिएको छ ।
