लहान नगरपालिका–१४ बस्तिपुरको खुट्टीखोलाको पश्चिम डिलमा १२ विघा क्षेत्रफलमा फैलिएको ‘आश्रम’ छ। चारैतिर रुखविरुवाले घेरिएको आश्रमकोबीचमा कच्ची र पक्कि घरहरु छन्।
कति घर निर्माण भैसकेका छन् भने कति निर्माणाधिन छन्। बीचमा फुसको छानो भएको दलान छ। समाजवादी नेता प्रदीप गिरिको अधिकत्तम समय यसै दलानमा राखिएको आराम कुर्सीमा सुभचिन्तकसँग विचार मन्थन गर्दै बित्थ्यो। अब यो आराम कुर्सी गिरि टोलाउँदै खाली रहनेछ। आश्रममा छाएको बिराट सन्नाटा कायमै रहनेछ।
आइतबार आश्रम पुग्दा दलानमा बाँधिएकी गाई पनि शोकमा डुबेको अनुभूति हुन्थ्यो। रुखविरुवाले भरिएको आश्रममा चराचुरुंगीको चिरबिर पनि सुनिएन। लाग्थ्यो प्रकृति पनि शोकमा डुबेको छ। र, प्रकृतिप्रेमी प्रदीपप्रती भावपूर्ण श्रद्धाञ्जली अर्पण गर्दैछ।
