रानीबारीस्थित आसरा सुधार केन्द्रमा अहिले १ सय १९ जना सेवनकर्ता ड्रग्स छाड्ने अभ्यास गरिरहेका छन् । आसरामा सबैभन्दा धेरै मानिस मदिराको लत सुधार्न धाउने गरेका छन् । 

सबैभन्दा धेरै ‘मदिरा सेवनकर्ता’हरू उपचार गराउन आउने गरेको सुधार केन्द्रका क्याम्प कमाण्डेन्ट इन्स्पेक्टर मदन केसीले रातोपाटीलाई बताए । मदिरापछि ब्राउन सुगर, गाँजा, इन्जेक्सन र ट्याब्लेट प्रयोगकर्ताहरूलाई परिवारले सुधार केन्द्रमा राख्ने गरेका छन् । आइस ड्रग्स र खोकीको औषधी सेवनकर्ताहरू थोरै सङ्ख्यामा सुधार केन्द्रमा जान्छन् । लागू औषध प्रयोगकर्ताहरूले चिकित्सकको सल्लाह बिना खोकीको औषधी एकैपटक धेरै खाने गर्छन् ।  

‘आफूलाई सकारात्मक राखौँ’ भन्ने नारासहित नेपाल प्रहरी श्रीमती संघको संरक्षणमा सो सुधार केन्द्र २५ वर्षदेखि सञ्चालित छ । प्रहरीको सुरक्षा घेराभित्र सञ्चालित सुधार केन्द्रको आफ्नै कथा छ । २०५४ सालमा उपत्यकामा धेरै अपराधका घटना भएपछि प्रहरीले सर्च अपरेसन चलायो । अपरेसनमा २७२ जना समातिए । तीमध्ये १११ जना लागु औषध प्रयोगकर्ता थिए । त्यसपछि, प्रहरी प्रधान कार्यालयले सुधार केन्द्र सञ्चालन गर्ने निर्णय गरेको थियो । २०५४ असार १ मा ‘लागू औषध दुर्व्यसनी सुधार शिविर’को नामबाट सो सुधार केन्द्रको जग राखिएको थियो ।