स्थानीय तह निर्वाचनको परिणाम आउँदै केही परिणाम आश्चर्यजनक देखिन थालेका छन्।
खासगरी काठमाडौँ महानगरमा स्वतन्त्र उम्मेदवार बालेन्द्र शाहले अग्रता लिइरहँदा कतिपय मानिसका मनमा प्रश्न उठ्न थालेको छ–कतै यो दलीय पद्धतिविरुद्धको मत त होइन? त्यसो त जनकपुर र धनगढी उपमहानगरपालिकामा पनि स्वतन्त्रहरूकै अग्रता छ र नगरपालिकामध्ये धुलिखेलमा पनि स्वतन्त्रले नै अग्रता कायम गरेको छ।
महानगर, उपमहानगर वा नगर भनेको तुलनात्मकरूपमा प्रबुद्ध मतदाता भएको क्षेत्र हो। किन ती ठाउँमा राष्ट्रिय भनिएका दलहरू पछाडि पर्दैछन् ? एउटा दल मात्र होइन, दलीय गठबन्धनका उम्मेदवारहरू पछि परेका छन्।
यी सबैको एउटै जवाफ हुन सक्दैन। बालेन्द्र शाहको उम्मेदवारी विशुद्ध गैरराजनीतिक हो। उनको मान्यतामा स्थानीय सरकार राजनीतिक दलले हाँक्ने होइन। उनले देशभर नै स्वतन्त्र उम्मेदवार बन्न र बनाउनका लागि धेरै प्रयत्न गरे। देशभर स्वतन्त्र वा अरू कुनै नाम दिइए पनि लौरो चुनाव चिह्नलाई उनले प्रतीकात्मकरूपमा देशका विभिन्न तहमा उम्मेदवार बनाउने प्रयत्न गरे। उनीहरू लौरो चिह्नलाई आधार बनाएर राजनीतिक दल बनाउनेतिर लाग्लान्न/लाग्लान्, यो भोलिको कुरा भयो। यो सम्भावनालाई नकारिहाल्ने अवस्था छैन। उनीहरूले भारतको आमआदमी पार्टीको सिको गर्न खोजेका छन् तर यतिबेला उनीहरूको रूप स्वतन्त्र देखिएको छ।
