चर्चित अभिनेता पल शाह अहिले बलात्कार अभियोगमा तनहुँ प्रहरी हिरासतमा रहेका छन् । बलात्कारको अर्को अभियोगमा जिल्ला प्रहरी कार्यालय चितवनमा अनुसन्धान भैरहेको समाचार आएका छन् । प्रहरी अनुसन्धानको क्रममा उनी निर्दोष देखिए अदालतमा मुद्दा दर्ता हुनेछ । उनी कसुरदार हुन् वा होइनन् भन्ने अदालतले निर्णय गर्ने विषय भयो । कसुरदार देखिए भने प्रचलित नेपाल कानुन अनुसार सजाय पनि अदालतबाट निर्धारण हुने नै छ । निर्दोष सावित भए पुनः नेपाली कला क्षेत्रमा संलग्न होलान् ।
यहाँ पीडित बालिका वा अभिनेता पल शाहको विषयमा भन्दा पनि बलात्कारका घटना र ती घटनालाई हेर्ने हामी वा हाम्रो समाजको चरित्र र यसले हामीलाई कता लैजाँदैछ भन्ने विषयमा सामान्य चर्चा मात्र गर्ने प्रयास गरिएको छ ।
के हो बलात्कार ?
बलात्कार जुनसुकै देश, समाजमा घटिरहने घटना हो । यसलाई सामाजिक कलंकको रूपमा लिइन्छ । परिवार, विद्यालय, समाज वा कार्यालय सबैतिर यस्ता घटना दिनहुँ घटिरहेको देखिन्छ । बलात्कारबाट बालक समेत पीडित भैरहेको पाइन्छ । बालिकाको तुलनामा यस्तो संख्या न्यून देखिन्छ । यूनिसेफका अनुसार विश्वमा प्रत्येक १० जना बालिकामध्ये १ जना कुनै न कुनै रूपमा बलात्कार एवं यौन हिंसाबाट पीडित भइरहेका छन् ।
