छाउ गोठ भत्कायो भन्छन्, कागजमा एैले
पूरै भोग अन्नपानी, खान पाइन कैले
विन्न गोरसको खाना, निन लाग्दैन रात
बाँचिन्छ कि मरिने हो, था छैन प्रभात !
माथिका डेउडा गीतका हरफ वरिष्ठ डेउडा गायक भोजराज भट्टले गाउँदै गर्दा विद्यालयको चौरमा बसेर गीत सुनिरहेकी चाँपसल्ली बस्तीकी बेलु रोकाया आफ्नै जीवनको यथार्थ चित्रण गरेको सम्झँदै थिइन्। महिनावारी हुँदा जाडो मौसममा भोग्नुपरेको पीडा सम्झँदै उनका आँखाका डिलमा आँशु टिलपिलाउँदै थिए।
रोकाया मात्रै हैनन् ओलानीस्थित शिव प्राथमिक विद्यालयको प्राङ्गणमा छाउपडी कुप्रथासम्बन्धी सचेतना कार्यक्रममा उपस्थित हुन आएका ५ सय २१ जना महिलाले आफ्नै पीडा समेटिएको महसुस गरे। ‘डेउडा गायक भट्टले गीत गाउँदा हामीले महिनावारी हुँदा भोग्नु परेको पीडा सम्झियौं,’ अगुवा महिला डम्मरी खड्काले भनिन्, ‘हाम्रो यथार्थ जीवनसँग मेल खाने गीतले भावुक बनायो।’
