सायद आजभोलि कोही पनि मानिस एक छिन पनि खाली खुट्टा हिँड्न सक्दैनन् होला तर जाजरकोटका कालीबहादुर रावत भने छ दशकभन्दा बढी समयदेखि खाली खुट्टा हिँडिरहेका छन्।
दशकौँ खाली खुट्टा हिँड्दा हिँड्दा बानी परिसकेका उनी पत्थरजस्ता कडा पैतालाले नै आफ्नो लागि जुत्ता चप्पलको काम गरिरहेको ठान्छन्।
"जुत्ता चप्पल लगाएँ भने हिँड्नै जान्दिनँ", उनी भन्छन्, "मेरा पैताला नै जुत्ता चप्पल जस्तै कडा छन्। न काँडाले कोप्छ न त ढुङ्गाले नै काट्छ।"
युवा अवस्थामा महिना दिनसम्म खाली खुट्टा हिँडेरै नेपालगन्जबाट नुन ल्याएको सम्झँदै उनले त्यो समयमा नङहरू भाँचिने, ढुङ्गाले काट्ने र काँडा बिझ्ने समस्या खेप्ने गरेको तर अहिले भने त्यस्तो खेप्नु नपरेको बताउँछन्।
नलगाड नगरपालिका- ६, गराग्लीका रावत खाली खुट्टा हिँडे पनि अहिलेसम्म केही समस्या नभएको बताउँछन्।
