नेपालको जेठो त्रिभुवन विश्वविद्यालय अहिले समस्यै समस्याको थुप्रोमा जकडिएर रहेको छ। विगतमा नेपालको उच्च शिक्षाको विकासमा महत्त्वपूर्ण भूमिका निर्वाह गरेको यो विश्वविद्यालय नेपालका राजनीतिक परिवर्तनको आधारभूमि समेत हो।
यसै विश्वविद्यालयबाट प्रशिक्षण प्राप्त गरेका र संगठित भएका शिक्षित व्यक्तिहरूले नै राजनीतिक परिवर्तनको शंखघोष गर्दै आएका छन्। राष्ट्रको समग्र सुधारका लागि योगदान पुराएको तथा देशको चौतर्फी विकासका लागि योग्य जनशक्ति उत्पादन गर्ने भूमिकामा रहेको त्रिभुवन विश्वविद्यालय स्वयम्का लागि भने राजनीतिक परिवर्तनहरू घातक सिद्ध भएका छन्। खासगरी २०४६ सालको राजनीतिक परिवर्तनपछि त्रिभुवन विश्वविद्यालय बेथितिको सिकार बन्न थालेको हो।
