झण्डै एक दशकअघि राजधानीबाट बेपत्ता भएकी ५१ वर्षीया छोरीमैयाँ महर्जनको अवस्था अझै अज्ञात छ। हाइप्रोफाइल व्यापारी दीपक मल्होत्राकी बहिनी निकी सिंह जोडिएको यो केसको रहस्य पुनः खोतल्ने क्रममा गत हप्ता हामीले सुरुमा यसलाई प्रहरीले खासै ध्यान नदिएकोबारे चर्चा गरेका थियौँ।
परिवार र सरोकारवालाको दबाबका बीच प्रहरीले अनुसन्धान ढिलै भए पनि अगाडि त बढायो, तर फितलो अनुसन्धानले पोइल गएको हल्लालाई आधार बनाएर ‘परपुरुषसँग सम्बन्ध रहेको’ निश्कर्ष निकाल्यो, जुन पछि पुष्टि हुन सकेन। त्यसैगरी भारतीय कनेक्सन पनि पुष्टि गर्न सकिएन।
सडकबाट दबाब बढ्दै जाँदा प्रहरीले छोरीमैयाँको परिवार र उनका निकट व्यक्तिहरुप्रति अनुसन्धान थाल्यो। यो क्रममा खुल्यो ढुकुटीको कनेक्सन।
ढुकुटी एउटा गैरकानुनी आर्थिक कारोबार हो। त्यसताका ढुकुटी खेल्ने निकै हुन्थे। ढुकुटी निश्चित संख्यामा तोकिएका व्यक्तिहरु मिलेर खेलिन्छ। खेलको नियमअनुसार ढुकुटी खानेले तोकिएको निश्चित ब्याज तिर्नुपर्छ। यो ब्याज रकम थप्दै लगानी गरिरहेका सदस्यहरूमाझ दामासाहीले बाँडिन्छ।
