सौराहा: शनिबार सौराहामा एमालेको बन्दसत्र चल्दै गर्दा सिन्धुलीका रेशम कार्कीले ज्वारीकोट हेरे।
'कति हो?'
'एक हजार हो। अल्लोको हो। धेरै राम्रो हुन्छ,' बिक्रेताले भने। दुई तीन पटक लगाए, फुकाले। त्यसपछि मोलमोलाई भयो। एक हजार रुपैयाँभन्दा भाउ घटेन। कार्कीले हजारको नोट निकालेर दिए। कोट लगाए।
थुप्रैले नयाँ ज्वारीकोट लगाएको देखेपछि आफू पनि खोज्दै यहाँ आइपुगेको कार्कीले सुनाए।
बन्दसत्र पस्ने गेटै अगाडि सडक किनारमा राखेको उनको स्टलमा उदयपुरका थीरबहादुर बस्नेत पनि आइपुगे। र, एकै छिनको मोलमोलाइपछि ज्वारीकोट भिरे।
'महाधिवेशन हेर्न चितवन आएका बेला चिनो लैजाऊ भनेर नि,' उनी भन्दै थिए, ‘सस्तो रहेछ अनि न्यानो पनि हुने देखियो।’
एमालेको १०औं महाधिवेशन स्थलमा सबैभन्दा रुचाइएको देखियो अल्लोको कोट र टोपी। महाधिवेशनमा सहभागी हुन आएका प्रतिनिधि तथा एमाले कार्यकर्ताले अल्लोको कपडा निकै मन पराए। केही महाधिवेशन प्रतिनिधि अल्लोकै कपडा लगाएर बन्दसत्रमा बसेका देखिन्थे।
