माया ठकुरी नेपालकी नाम चलेकी साहित्यकार हुन् । भारतको लखनउमा जन्मिएर नेपाली साहित्यमा पहिचान बनाउन सफल ठकुरीका कतिपय रचना नेपाल र भारतका विभिन्न तहका शैक्षिक पाठ्यक्रममा पनि समावेश छ । थोरै भए पनि गहन कथाहरू लेखेकी उनका कतिपय कथा हिन्दी, बङ्गाली, तमिल, जापानी र अङ्ग्रेजी भाषामा समेत अनूदित छन् । ‘बौलाहा’ शीर्षकको कविताबाट साहित्य यात्रा थालेकी उनी ‘नेपाली साहित्य नारी रत्नको सम्मान’ प्राप्त गर्ने पहिलो स्रष्टा हुन् । ‘नजुरेको जोडी’, ‘गमलाको फूल’, ‘माया ठकुरीका कथाहरू’ देखि ‘चरी चिरबिर’ सम्म उनका ८ कृति प्रकाशनमा आएका छन् । पछिल्लो समय नेपाल प्रज्ञाप्रतिष्ठानमा प्राज्ञका रूपमा रहेकी माया ठकुरीका जीवनका पाटाहरू रातोपाटीको ‘मेरो जीवन’ स्तम्भमा उनकै शब्दमा :
मीठो पकाउन सक्छु
मेरो मनपर्ने खाना नेपाली दाल, भात, तरकारी र अचार हो । मस्यौरा, गुन्द्रुकलगायत पनि मनपर्छ । माछा, मासुलगायत सबथोक मीठो लाग्छ । मन नपर्ने खानेकुरा केही छैन ।
अहिलेको समय रेस्टुरेन्ट जाँदिनँ भन्दा पनि साथीभाइ, परिवार र आफन्तले लान्छन् । रेस्टुरेन्टको पिज्जा, चाउमिन जस्ता खानेकुरो मनपर्दैन । म त रेस्टुरेन्टमा पनि नेपाली खाना खोज्छु । सानोमा अर्काको घरमा काम गरेर हुर्किएकी हुँ । त्यसैले सबथोक मीठो पकाउन सक्छु ।
