नेकपा एमाले मूलधारको राजनीतिक शक्ति हो। यतिखेर यो दल महाधिवेशनमा होमिएको छ। देशभरबाट महाधिवेशनस्थल चितवनमा भेला भएका ८ लाख सदस्यबाट निर्वाचित प्रतिनिधिहरूलाई पार्टीमा रक्तसञ्चार गराउँदै नयाँ नेतृत्व चुन्ने दुर्लभ अवसर प्राप्त भएको छ।
नेकपा एमाले देशको प्रमुख प्रतिपक्षी पार्टी पनि हो। मुलुककै सबैभन्दा ठूलो पार्टी भएकाले सबै पक्षको ध्यान दसौं महाधिवेशनमा केन्द्रित छ। यसका शुभचिन्तक,प्रतिस्पर्धी र आम नागरिकसमेतले चासो, चिन्ता र सरोकार व्यक्त गरिरहेका छन्– चितवन महाधिवेशनले कस्ता निर्णयहरू गर्ला? दसौं महाधिवेशन एमाले रूपान्तरण गर्ने अपूर्व ऐतिहासिक अवसर हो।
नेपाली समाज रूपान्तरणको जुन रफ्तारमा छ, यसलाई नेतृत्व गर्न सक्नु भनेको चानचुने कल्पना र अभ्यासले सम्भव छैन। ‘ग्लोबल–डिजिटल’ रफ्तारलाई पहिचान गरेर अगाडि बढ्ने मार्गप्रशस्त गर्नु लर्तरो दृष्टि, योजना र कार्यक्रमबाट सम्भव हुन सक्दैन। असल, इमानदार, चनाखो र कर्तव्यनिष्ठ नेतृत्वबिना एमाले रूपान्तरण सम्भव पनि छैन।
