आशुतोष तिवारीले हिजो फेसबुकमा प्रश्न गरे - के भयो त नेपाल टुरिज्म बोर्डको सीईओलाई? उनलाई माफी दिइयो कि नाई?
मिडिया मौन रहेको टिप्पणी गर्दै उनले थप प्रष्ट पारे - '...हाम्रो प्यारो नेपालमा यस्तो डिसिप्लिनरी केसमा कसरी कस्तो निर्णय माथिबाट हुँदो रहेछ भनेर जान्न चाहेको।'
६ बोतल ड्युटी फ्री मदिरा ल्याउन अवरोध गर्दा कर्मचारीमाथि हातपात गरेर 'चर्चित' बनेका धनन्जय रेग्मीमाथि कारवाही चासो तिवारीलाई मात्र होइन, धेरैलाई छ। विवाद ठूलो आर्थिक मुद्दासँग जोडिएको होइन, त्यसभन्दा ठूलो नैतिकतासँग जोडिएकाले पनि चासो फरक हिसाबले हुनु अस्वभाविक थिएन।
एयरपोर्टमा भन्सारका नायब सुब्बालाई आफ्नो लगेजले हिर्काउने प्रमुख कार्यकारी अधिकृत डा. धनन्जय रेग्मीलाई स्पष्टीकरण त सोधियो तर राजनीतिक उच्च दबाबमा कारवाहीमा आलटाल हुन थालेको छ।
रेग्मीले भन्सार कर्मचारीलाई लगेजले हानेको सीसीटीभी फुटेज सार्वजनिक भइसकेको छ। लण्डनमा पर्यटन प्रवर्द्धनको एक कार्यक्रम सकेर फर्किने क्रममा रेग्मीले भन्सार कर्मचारी सुमन थापालाई दुर्व्यवहार गरेका थिए। उनले त्यसो गरिरहँदा मदिरापान गरेको पुष्टि भएको थियो - काठमाडौं मेडिकल कलेजमा परीक्षण गर्दा। विवादित पृष्ठभूमिका रेग्मीले केपी शर्मा ओली प्रधानमन्त्री हुँदा कांग्रेसका सभापति शेरबहादुर देउवाविरुद्ध फेसबुकमै कडा अभिव्यक्ति दिएका थिए जुन उनले पछि मेटाएका थिए।
