पूर्व–पश्चिम राजमार्ग अन्तर्गत दाङको लमहीमा बस दुर्घटना भएको छ। दुर्घटनामा परी २९ जना घाइते भएका छन्।
सुर्खेतबाट काठमाडौं जाँदै गरेको कर्णाली प्रदेश ०२–००१ ख ०२१९ नम्बरको बस लमही नगरपालिका–३ मा गएराति १ः४५ बजे दुर्घटना भएको वडा प्रहरी कार्यालय लमहीले जनाएको छ।
दुर्घटनामा ७ जना गम्भीर घाइते भएका छन्। उनीहरुको लमहीमा प्राथामिक उपचारपछि बाँकेको कोहलपुर रेफर गरिएको छ। अन्य घाइतेहरुको लमही अस्पतालमै उपचार भइरहेको प्रहरीले जनाएको छ।
घाइतेहरूको नाम ठेगाना भने खुल्न सकेको छैन। गुडिरहेको बसको पट्टा भाँचिएपछि अनियन्त्रित भइ बस पल्टिएको चालकको भनाइ उद्धृत गर्दै प्रहरीले जनाएको छ। बस चालकलाई प्रहरीले नियन्त्रणमा लिएको छ।
