ललितपुरको नख्खुस्थित कारागारमा चौकीदार र नाइकेहरू मिलेर त्यहाँका कैदीहरूबाट मासिक २५ लाखभन्दा बढी असुल्ने गरेको भेटिएको छ । छानविन समितिले आफ्नो प्रतिवेदनमा असुली हुने गरेको उल्लेख गरेको हो । नख्खु कारागारमा सीआरसी, डीआरसी र नयाँ ब्लक गरी ३ वटा ब्लक छन् । तीमध्ये सीआरसी ब्लकका कैदीबन्दीले आफूहरुमाथि आर्थिक र शारीरिक शोषण गरेको आरोप लगाउँदै चौकीदार र नाइकेहरुबिरुद्ध आन्दोलन चर्काएका थिए । चौकीदार विशाल विष्ट र नाइके शिव चौधरीसहितलाई कारवाहीको माग गर्दै जेलभित्र भदौ २० मा आन्दोलन चर्किएपछि अर्को दिन जिल्ला प्रशासन कार्यालय ललितपुरले छानविन समिति गठन गरेको थियो ।
कारागार व्यवस्थापन विभागका तत्कालीन निर्देशक रामचन्द्र तिवारीको नेतृत्वमा गठित छानविन समितिले नख्खु कारागारको समस्या र आन्तरिक सुधारका लागि सुझावसहितको प्रतिवेदन बुझाएको छ । कारागार व्यवस्थापन विभागका महानिर्देशक जनकराज दाहाललाई भदौ ३१ मा समितिले प्रतिवेदन बुझाएको थियो । तर, महानिर्देशक दाहालले प्रतिवेदन कार्यान्वयन गरेका छैनन् ।
जेलभित्रै जुवा अड्डा
नख्खु कारागारभित्र चौकीदार र नाइकेहरुले जुवा अड्डा चलाउने गरेको पनि भेटिएको छ । समितिले नाइके शिव चौधरीको कोठाबाट जुवा खेल्न प्रयोग गरिने चिनियाँ भाषामा थाङ भनिने गोटी ४ थान, तामा र पित्तलको सिक्का बरामद गरेको छ ।
