दृश्य : एक
(यमुनाको किनारमा रहेको कल्पीस्थित वेदव्यासको आश्रम । शान्त वातावरणमा वेदव्यास आश्रम बाहिर बसिरहेका छन् । उनी केही लेख्नमा व्यस्त छन् । राजा धृतराष्ट्र आफ्ना सारथि सञ्जयको सहारामा आश्रममा आइपुग्छन् । अचानक राजा धृतराष्ट्रलाई आफ्नो आश्रममा देखेर वेदव्यास आश्चर्य मान्छन् । उनी आफ्नो ठाउँबाट उठेर राजाको स्वागत गर्छन् ।)
वेदव्यास : (स्वागत गर्दै) ओहो ! महाराज धृतराष्ट्र, तपाईं यहाँ ?
धृतराष्ट्र : (वेदव्यासलाई प्रणाम गर्दै) हजुरले मलाई ‘तपाईं’ भन्दा साह्रै अप्ठ्यारो महुस हुन्छ, महर्षि वेदव्यास । कस्तो नमिल्दो कुराजस्तो लाग्छ । हाम्रो परम्परा र संस्कृतिमा पिताले पुत्रलाई ‘तपाईं’ भनेर सम्बोधन गरेको मलाई थाहा छैन ।
