धरानको सबैभन्दा पुरानो पब्लिक हाई स्कूलमा केटा मात्रै पढ्थे भने शारदा बालिका विद्यालयमा केटी। तर, हाम्रो स्कूलमा भने शुरूदेखि नै केटाकेटी दुवै पढ्थे। धरानमा यस्तो सह-शिक्षाको थालनी गर्नेमा अग्रणी थियो, हाम्रो श्री भगवती मिडिल स्कूल।
यसो त मैले धरान पब्लिक हाई स्कूलबाट एसएलसी परीक्षा दिएको हुँ, त्यहाँ नौ र दश कक्षा पढेपछि। तर, मेरो शुरूको स्कूल भने श्री भगवती मिडिल स्कूल थियो जो संवत् २०१० मा स्थापित भएर अहिलेको लक्ष्मी चोक नजिक दीनानाथ बास्तोलाको घरको भुइँतलामा सञ्चालित थियो। काठ र टीनको एउटा ससानो घर बनाएर त्यही लक्ष्मी चोकमा बस्न पुगेका थियौं हामी पनि। स्कूल खुलेको दोस्रो वर्षमा हुनुपर्छ, म मिडिल स्कूलमा भर्ना भएको।
शायद आमाले पुर्याउनुभयो जस्तो लाग्छ स्कूलमा भर्ना गर्नलाई, अरू मेरा दामलका केटाकेटीहरूका साथमा। बा त यस्तो अवसरमा कहिल्यै उपस्थित भएको याद छैन, एक त पेशाले र अर्को उहाँले समातेको राजनीतिको कारणले।
एउटी निरक्षर र अनपढ नारीलाई आफ्नो छोरालाई स्कूलमा भर्ना गराउन के कुराले अभिप्रेरित गर्यो होला, त्यो म भन्न सक्तिनँ। तर, म भर्ना भएँ एक कक्षामा। जस्तो स्कूल त्यस्तै विद्यार्थी वा भनौं, जस्तो विद्यार्थी त्यस्तै स्कूल।
