त्यो बखत जुम्लेलीको मुख्य बजार बाँकेको नेपालगञ्ज थियो, जहाँ पुग्न जुम्लादेखि ११ दिन जति पैदल यात्रा गर्नुपर्दथ्यो भने भारी सहित फर्कंदा १४ दिन जति लाग्थ्यो।
पाँच दशक अघि सत्यमोहन जोशी, स्थिर जंगबहादुर सिंह, बिहारीकृष्ण श्रेष्ठ, चूडामणि बन्धु र प्रदीप रिमालले कर्णालीको जुम्ला पुगेर स्थलगत अध्ययनका आधारमा लेखेको पुस्तक कर्णाली लोक संस्कृति’ ले २०२८ सालको मदन पुरस्कार प्राप्त गरेको थियो। त्यो पुस्तकको दोस्रो संस्करण भर्खरै हिमाल किताबले प्रकाशन गरेको छ। त्यति वेलाको जुम्ला यात्रा, जुम्लेली समाज स्मरण गर्दै अहिले लेखक बिहारीकृष्ण श्रेष्ठले दोस्रो संस्करणका लागि लेखेको भूमिका :
आधा शताब्दी पहिलेका तुलनामा नेपालमा अहिले समाजविज्ञानका विभिन्न विधाको पढाइलेखाइमा निकै विकास भइसकेको भए तापनि स्थलगत प्रत्यक्ष शोधकार्यमा आधारित अनुसन्धान सामान्यतः दुर्लभ छन्। यस परिप्रेक्ष्यमा पाँच दशक अगाडि त्यो पनि अति दुर्गम तथा जीवनयापनको अवस्था कठिनतम रहेको जुम्लाको भौगोलिक परिवेशमा गरिएको यो अन्वेषणमूलक कृतिको आफ्नै महत्व छ।
