पाललाई ‘मित्रवत् छिमेकी र रणनीतिक सहकार्यको साझेदार’ का रूपमा हेर्दै आएको चीनले यहाँको राजनीतिक अस्थिरतामाथि भने बारम्बार दिक्दारी जनाउँदै आएको छ।
चीनको विदेश नीति सम्बन्धमा सन् २००८ रोचक समय थियो। एकातर्फ, विश्व आर्थिक मन्दीका कारण पश्चिमा उदार संस्थाहरू लडखडाएकाले संयुक्त राज्य अमेरिकाको रजाइँ घटाउन त्यो समय मानक बन्यो भने अर्कोतर्फ, बेइजिङ ओलम्पिकको सफलतापूर्वक आयोजना र आर्थिक मन्दीको प्रकोप जित्दै चीन नेतृत्व आफ्नो परराष्ट्र नीतिमा थप दृढ बन्दै गयो।
त्यसको एक वर्षपछि सन् २००९ मा तत्कालीन उपराष्ट्रपति सी चिनफिङले मेक्सिकोमा आयोजित एक अन्तर्राष्ट्रिय बहसमा चीन अझै मुखर हुने सङ्केत दिए। पिटर मार्टिनले पछिल्लो पुस्तक चाइना’ज् सिभिलियन आर्मीमा लेखेका छन्, त्यो वेला कतिपय विदेशीहरूसँग ‘अरूलाई औंला देखाउनु बाहेक अर्थोक गतिलो काम छैन’ भन्ने सीको खुला गुनासो ‘चाइनिज नेटिजन्स’ समेत भनिने चिनियाँ इन्टरनेट प्रयोगकर्तामाझ सर्वाधिक चर्चामा रह्यो।
त्यति वेला भर्खरै देशका शीर्ष–अधिकारीको लक्ष्य प्रारम्भिक चरणबाट नै चिनियाँ ‘नेटिजन्स’ लाई बुझाउन चीनको सबैभन्दा ठूलो सोसल मिडिया प्लाटफर्म वेइपो सञ्चालनमा आएको थियो। त्यो वेलादेखि चिनियाँ ‘नेटिजन्स’ ले विश्व घटनाबारे आफ्ना धारणा व्यापक मात्रामा अभिव्यक्त गर्दै आएका छन्।
