चौरजहारी नगरपालिका–१३ रुकुम पश्चिमका चुडामणि देवकोटा (४७) ले जीवनका महत्वपूर्ण आठ वर्ष सशस्त्र द्वन्द्वमा विताए। ‘मृत्यु’ वा ‘मुक्ति’को नारा बोकेर कुनै समय बन्दूक बोकेर माओवादी लडाकुको परिचय बनाएका देवकोटा अहिले उदाहरणीय कृषक हुन्। रुकुम माओवादी द्वन्द्वको उर्वर भूमि। आठ वर्षसम्म बन्दूक बोकेका उनी माओवादी शान्ति प्रक्रियामा आएसँगै लडाकु शिविरमा गएनन्, व्यवसायमा लागे। रुकुम नजिकको दाङमा उनले घर–जग्गा कारोबार सुरु गरे। राम्रै आम्दानी भयो। पैसा कमाएपनि उनी घर–जग्गा कारोबारबाट सन्तुष्ट भएनन्।
दाङ हुँदै सुर्खेत पसेका उनी अहिले व्यवसायिक भैंसीपालक कृषक हुन्। भेरीगंगा नगरपालिका–५ तोलीखोलामा उनको राप्ती मुनाल बहुउद्देश्यीय कृषि फर्म छ। फर्ममा ४० भन्दाबढी भैंसी छन्। देवकोटा आफै भैंसीकालागि घाँस काट्नेदेखि मल सोहर्नेसम्मको काम गर्छन्। दैनिक दुई सय लिटर दुध बोकेर उनीसहितका कर्मचारी व्यक्तिका घरघरमा पुग्छन्। भैंसी फर्मले ‘थुनदेखि मुखसम्म’ नारा तय गरेको छ। ‘त्यहीँ नारा कार्यान्वयनका लागि फर्मबाट सिधै ग्राहकहरुको घरघरमा दुध पुर्याउन जान्छौं,’ उनले भने, ‘शुद्ध दुध भएकाले बजारको समस्या छैन्।’ फर्मले दैनिक दुई सय लिटर दुध विक्री गर्छ।
