कार्यस्थलमा पुरुषमाथि महिलाबाट हिंसा हुन्छ कि हुँदैन ? ‘मिडिया एड्भोकेसी ग्रुप’ले एक महिनाअघि यही विषयमा छलफल गरेको थियो, पुरुष पत्रकारसँग। आफ्ना अनुभव राख्ने क्रममा मैले त्यहाँ भनेको थिएँ, ‘जवान बाहिरी महिलासँग कुरा गर्दा कहाँ हेर्ने भन्ने समस्या हुन्छ। त्यसमाथि अधिकारकर्मी महिला हो भने अझ बढी सचेत भइन्छ। ’  

यो मेरो मात्रै निजी अनुभव थिएन, मलाई अरू धेरै पुरुषले यसबारे सुनाएका थिए। कुनै जवान महिलासँग कुरा गर्दा कतिबेरसम्म आँखामा हेर्नु ! अन्तैतिर हेरेर कति कुरा गर्नु ! घरीघरी संवेदनशील अंग ओठ, छाती लगायत नछोपिएका भागमा आँखा पुग्छन्, कतिपय अवस्थामा त अवचेतन रूपमा आँखाहरू त्यहाँ गढ्नै पुग्छन्। र, महिलाहरूले अप्ठेरो महसुस गर्छन्।

मलाई एक पत्रकार बहिनीले भनेकी थिइन्, ‘आफ्नो शरीरमा यौनजन्य परिवर्तन आएदेखि नै महिलाले अन्य पुरुषले छोएको र आफ्ना अंगमा हेरेको छिटै महसुस गर्छन्। तर, उक्त पुरुषले कुन नियतले छोयो वा हेर्‍यो भन्ने बेग्लै पाटो हो।’