प्रमुख प्रतिपक्षी दल नेकपा एमालेको केन्द्रीय कमिटीको बैठक च्यासलस्थित तुलसीलाल अमात्य स्मृति भवनमा जारी छ। माधव नेपाल नेतृत्वमा औपचारिक रुपमा पार्टी विभाजन भएको भोलिपल्ट उक्त बैठक बसेको हो ।
आन्तरिक समस्या समाधानका लागि कार्यदलले तयार गरेको १० बुँदे प्रस्ताव कार्यान्वयनसम्बन्धी स्थायी कमिटीको निर्णय अनुमोदनलगायत विषयमा छलफल गर्न केन्द्रीय कमिटीको बैठक डाकिएको हो।
यही भदौ ८ गतेको स्थायी कमिटीको बैठकले गत असार २७ गतेको आन्तरिक विवाद समाधान कार्यदलको सिफारिसलाई कार्यान्वयन गर्दै पार्टीको संरचनालाई नेकपा (माओवादी केन्द्र) को एकतापूर्व (२०७५ जेठ २०) कै अवस्थाबाट सञ्चालन गर्ने निर्णय गरेको थियो। पार्टीले आगामी मङ्सिरको दोस्रो साता दशौँ राष्ट्रिय महाधिवेशन गर्ने तय गरेको छ।