नूरिया हया सुँडिनी हुन्। काम गर्ने दिन उनी पुरुष चिकित्सकहरूसँग नियमित बैठक र छलफलमा बस्थिन्।
ती बैठकका निर्णयले हया कार्यरत स्थानीय मानिसको उपचार र सार्वजनिक स्वास्थ्य केन्द्रलाई प्राथमिकतामा राख्थ्यो। उक्त स्वास्थ्य केन्द्र अफगानिस्तानको ग्रामीण जिल्ला इश्कामिशमा छ जुन ताखार प्रान्तमा ताजिकिस्तानसँगको उत्तर-पूर्वी सीमामा पर्छ।
हालसालै २९ वर्षीया हयाले थाहा पाइन् कि अब महिला र पुरुष कर्मचारीबीच बैठकमा प्रतिबन्ध लगाइएको छ।
तालिबानले देश नियन्त्रणपछि दिएको पहिलो आदेश भएको उनी बताउँछिन्। यो अवस्थामा उनी आफ्नो जीवनमा हुनसक्ने सम्भावित परिवर्तनहरूबारे आफैसँग प्रश्न सोध्न मात्र सक्छिन्।
इश्कामिश हिन्दकुश पर्वत शृङ्खलामा छ। एउटा प्रमुख सीमा क्षेत्र जहाँबाट गत मे महिनामा नाटोले करिव दश हजार सेना फिर्ता पठाउने भएपछि तालिबानहरू उत्साहित भएका थिए।
मे महिनाको मध्यसम्म दक्षिणी हेलमन्ड सरकारी फौजहरूसँगको लडाइँ चर्काएर कट्टरपन्थी इस्लामी समूहले उत्तरी बुर्का जिल्लालाई नियन्त्रणमा लियो।
लगभग त्यसै समयमा अमेरिकी सेनाले कान्दहार हवाई अड्डा छोडे। अफगानिस्तानको दोस्रो ठूलो सहर कान्दहारस्थित देशको सबैभन्दा ठूलोमध्ये एक हवाई अड्डाबाट अमेरिकी सेना बाहिरिएपछि त्यहाँका स्थानीय मानिसहरू तालिबानको प्रगतिबारे सचेत थिए।
