वाणिज्य बैङ्कहरूको नाफा बढेर आधा खर्ब नाघेको छ । बैङ्कहरूले हालै मात्र सार्वजनिक गरेको तथ्याङ्क अनुसार २६ वटा वाणिज्य बैङ्कहरूले गत आर्थिक वर्ष २०७७/७८ को १२ महिनामा अर्थात् चौथो क्वार्टरको अन्तसम्ममा कुल ५९ अर्ब ५७ करोड ७९ लाख ७२ हजार रुपैयाँ खुद नाफा आर्जन गर्न सफल भएका हुन् ।
यस्तो नाफा अघिल्लो आर्थिक वर्ष २०७६/७७ को सोही अवधिमा कुल ४८ अर्ब ४२ करोड ४ लाख ६८ हजार मात्र थियो । समीक्षा अवधिमा बैङ्कहरूले थप ११ अर्ब १५ करोड ७५ लाख ४ हजार रुपैयाँ बढीले नाफा आर्जन गर्न सफल भएका छन् । जुन अघिल्लो वर्षको तुलनामा २३.०४ प्रतिशतले नै बढी नाफा आर्जन हो ।
यो हिसाबले अन्य व्यावसायिक क्षेत्रहरू कोभिड–१९ का कारण प्रताडित भइरहँदा पनि यता बैंकिङ्ग क्षेत्रले भने राम्रै व्यापार गरिरहेको स्पष्ट देख्न सकिन्छ । त्यति मात्र नभएर केही बैङ्कहरूको नाफाको दरलाई हेर्ने हो भने झनै आक्रामक देखिन्छ ।
